sætasta síðan

læf gós on...

Mon, 05 Jan 2009 20:57:44 GMT

Nýtt ár og nýtt upphaf.

Eða….nýtt ár og allt heldur áfram.

2008 var ágætisár.

2009 byrjar ágætlega og ég vona að það verði mér gott.

Ég stefni að því að útskrifast í vor.

Ég er búin að ráða mig í vinnu fram í Júní.

Ég ælta að vera mjög dugleg fram á sumar…...slaka svo kannski á eftir það…við skulum sjá!!

Ég vona að ég sé ekki að færast of mikið í fang.

Er pínu kvíðin en skal hafa þetta.

Allir byrja sínar rútínur í þessari viku og ég hlakka til að koma öllu í rétt horf.

Gleðilegt ár mæ frends!!

Thu, 01 Jan 2009 11:03:26 GMT

Gleðilegt ár mínir kæru vinir í bloggheimum.

Árið 2008 var þokkalegt í mínu lífi en ég spái því að 2009 verði enn betra.

Hlakka til að takast á við það sem koma skal.......

lifið heil......

Nú er mál að skreyta og gera jólalegt!!

Tue, 23 Dec 2008 12:59:43 GMT

Ég er að skreyta húsið pínulítið með börnunum mínum og reyna að gera svolítið jólalegt hér heima.

Ég á eftir að fara í bæinn og kaupa smá gjafir og klára að pakka nokkrum inn.

Seinnipartinn í dag er svo laxa-opna húsið fyrir þá sem ekki borða skötu á þessum Drottins degi....já eða þá sem langar líka í reyktan og grafin lax.

Á morgun koma svo jólin og ég er að hugsa um að njóta þeirra.

Ég óska ykkur öllum gleðilegra jóla, ljóss og friðar.

Jóla-skóla-frí....jibbí

Sat, 13 Dec 2008 00:22:07 GMT

Ég er komin í jólafrí og ég elska það.

Ég kláraði síðasta verkefnið mitt í morgun og skilaði og nú tekur bara sælan við....þ.e. að koma heimilinu í lag eftir prófatörn foreldranna og undurbúa jólin!

Ég ætlaði að blogga rosalega í tilefni af próflokum...en ég er nýbúin að nota öll orðin mín í verkefni og annað....

Læt vita af mér þegar ég hef eitthvað að segja.

Próf og verkefnatíð

Thu, 04 Dec 2008 23:31:23 GMT

Er í prófum…eða verkefnavinnu.

Fer bara í eitt próf.

Ótal mörg verkefni sem þarf að gera og skila.

Milljón hlutir sem ég þarf að klára.

Vildi að ég væri komin í jólafrí.

Kemst vonandi í frí í kringum 12. Des.

Hlakka til.

Ekki lengur vetrarfrí....því miður!!

Sat, 22 Nov 2008 21:47:18 GMT

Það er víst löngu búið þetta vetrarfrí sem ég talaði um í síðasta bloggi!!

Það er dálítið langt frá vetrarfríi hér á bæ.

Hér reynum við hjónin að læra í kór.

Jón er að klára Byggingariðnfræðina sína um jólin og er því að bisa við að skrifa lokaverkefni og læra hellinga af öðru.

en sem betur fer sér loks fyrir endan á þessu skólaævintýri okkar hjóna.....ég veit ekki hvernig okkur datt í hug að það væri í lagi að vera bæði í háskóla eigandi tvö kraftmikil og skemmtileg börn.

En þetta er allt að koma.

Í vor vonast ég til að klára og allt í einu get ég ekki beðið eftir því.

Væri næstum til í að hraðspóla bara og vera allt í einu búin.

En það er víst ekki í boði....svo ég verð að klára allt of mörg verkefni og taka próf svo ég geti komist í jólafrí.

Ég er að drukkna í verkefnum.....en ég hef nú sagt það áður og er að vona að ég lifi þetta af eins og í hin skiptin.

Bið að heilsa fólki sem ég hef ekki séð lengi.

Vetrarfrí....

Fri, 07 Nov 2008 19:53:35 GMT

Það er komið vetrarfrí í skólanum.

Það þýðir að ég og börnin mín erum í fríi fram á miðvikudag.

Ég elska það!

Ég ætla að nota tímann í að gera lítið sem ekkert, þarf reyndar að reyna að læra smá þar sem slíkt hefur setið á hakanum undanfarið sökum brjálæðislegrar þreytu og leti eftir að heim kemur úr kennslu.

Ég á svo þrjá daga eftir af vettvangsnáminu mínu…sem sagt aftur í háskólann í þar-næstu viku….þá er víst eins gott að vera ekki með allt niðrum sig….

Kennslan hefur gengið vel. Reyndar svo vel að ég hef verið ráðin í vinnu í skólanum sem ég er að kenna í frá og með áramótum.

Þar sem kreppan hefur bitið hart í okkur heimilismeðlimi…(ég fer ekki nánar út í það hér þar sem viðkvæmar litlar sálir lesa þetta blogg) þarf ég að vinna með síðustu önninni minni í kennó og hlakka bara til að takast á við það þó álagið verði kannski meira en ég vonaðist til.

En er ekki lífið saltfiskur og ekki til neins að væla??

Læt þetta duga í bili……góða helgi.

er að kenna....

Thu, 16 Oct 2008 12:06:50 GMT

Þessa dagana er ég í vettvangsnámi í Álftanesskóla.

Nú kenni ég myndlist þar í 5 vikur og er það voða gaman.

Ég er reyndar búin að vera nær dauða en lífi úr þreytu þessa fyrstu daga en reynslan hefur kennt mér að það lagast þegar maður venst áreitinu og nýju aðstæðunum.

Ég er hjá frábærum kennara sem dregur fram það besta í sjálfri mér og er það mikið gott.

Mér finnst gott að vera í kringum fólk sem hefur góða nærveru.

Ég er sem sagt frekar kát en sybbin núna.

kreppa smeppa

Tue, 07 Oct 2008 13:46:24 GMT

Ég þoli ekki krepputal

Ég þoli ekki að það er kreppa

Ég nenni ekki að hafa þetta svona og tek þetta ógurlega mikið inn á mig.

Ég ákvað í morgun að láta nú hverjum degi nægja sína þjáningu.

Ég keypti mér austurlenskt nuddtæki í gær og fór með það í skólann í morgun og nuddaði stelpurnar.

Ég tók með mér fallega ljóðabók og við skoðuðum hana og lásum nokkur heilræði.

Ég ætla ekki að láta þessa kreppu ræna mig geðheilsunni.

Ég er að hugsa um að fara í hugleiðslu í kvöld.

OK OK ég skal blogga smá....

Mon, 29 Sep 2008 23:18:32 GMT

Jæja þið eruð búin að standa ykkur vel í kommentum svo ég skelli inn einni færlsu í verðlaun.

Það er kolbilað að gera í skólanum og ég verð að viðurkenna að ég er stundum nálægt því að gefast upp.

Ég veit ekki hvort ég er bara ekki nógu hress almennt eða hvort ég er í alvöru í svona leiðinlegum fögum en ég er allavega ekki að njóta þess að vera í skólanum núna.

Því miður.

Ég ætla samt að klára þessa önn…..ein önn í einu og þá nálgast ég þetta smátt og smátt

Ég fer í fimm vikna vettvangsnám á þessari önn, byrja um miðjan október og sóttist mjög stíft eftir því að fá að vera ein í því þar sem kennaraháskólinn er nærri búin að drepa mig á samvinnu við aðra…….ég hef aldrei vitað annað eins.

Ég get verið mjög flink í að vinna með öðrum en ég er komin með svo gjörsamlega uppí kok á málamiðlunum og svona “já finnst þér frekar að við eigum að gera það” rugli að ég er hrædd um að ég gæti skaðað einhvern ef hann þyrfti að vinna með mér í meira en fimm mínútur.

En ég rökstuddi mál mitt vel og rækilega og fæ því að fara þetta “sóló”.

Ég verð í Grunnskólanum hérna á Álftanesi og kem til með að kenna myndmennt eingöngu.

Mér lýst ljómandi vel á kennarann sem verður með mig í “þjálfun”og held að þetta verði bara skemmtilegt.

Ég er langt komin með að gera kennsluáætlun og lýst svo vel á að fá að vera hér í sveitinni minni að ég held svei mér að verði hressari þegar ég þarf ekki að vera í tölvutímum og aðferðafræði daginn út og daginn inn.

Ykkur er óhætt að láta áfram vita af ykkur.......ég brjálast ekkert úr sorg ef ég fæ komment sko!

Það er nú svo.......

Sat, 20 Sep 2008 23:59:11 GMT

....að mér finnst ekki gaman að fá ekki eitt einasta komment!!!!

Hver nennir að blogga ef enginn virðist vera að lesa???

Ekki ég!!!!

Svo góðir lesendur (eða enginn-hvað veit ég) ef þið eruð þarna.... þá er bara að láta vita af sér.

Svona......ekkert feimnisvæl.....láttu vaða!!!

Kisa mín og litli sæti bíbí!!

Tue, 16 Sep 2008 19:46:54 GMT

Kisuræfillinn kom inn með lítinn þröst handa mér um daginn.

Þegar ég heyrði að ekki var allt með felldu fór ég í rólegheitum inn í eldhús (OK! OK!Ég þaut kannski þangað jafn hratt og Hvati í incredibúlls…en hvaaa), Klifraði upp á stól og þóttist vera að ná í blómavasa í efstu hillunni uppi í skáp og kallaði eins rólega (en ákveðið) og ég gat:

-Kolbeinn minn, tékkaðu hvort kisa er með mús eða eitthvað með sér inni í stofu, ég er nefnilega pínu upptekin!!!

Ég hélt svo auðvitað áfram að þykjast vera að leita að einhverju uppi í skáp og það hvarflaði ekki að mér að hjálpa til við þessa athugun.

Börnin mín bæði æddu auðvitað að kettinum og sáu sem var að kvikindið var ekki eitt á ferð og kölluðu:

-Jú hún er með fugl….en hann er reyndar dauður!!!

Ég verð að viðurkenna að einhverra hluta vegna er mér eiginlega alveg jafn illa við dauð dýr og lifandi….skil ekki alveg hvers vegna.

Ég kallaði í Jón sem var að bora inni í herbergi og hann fór inn í stofu og náði fuglinum í poka og jarðaði hann í skyndi í ruslafötunni úti.

Ég lyppaðist niður af stólnum og áttaði mig allt í einu á því að ég er að verða eins og konan í Tomma og Jenna….æði alltaf upp á stól ef mig svo mikið sem grunar að það sé mús í hverfinu…..hvað þá í húsinu mínu…..ég hreinlega lamast af ótta við þessi litlu kvikindi!!

Þegar mesti óttinn var runninn af mér fattaði ég eitt:

Ef fuglinn hefði verið lifandi, hefði það sennilega ekki breytt hann miklu þó að ég væri uppi á stól….hann auðvitað hefði getað flogið á mig…..og hvað hefði ég þá gert….farið uppí skáp eða???

En ég ryksugaði svo fjaðrir í bunkum og lét Jón þrífa blóðið eftir morðið og reyndi svo að láta sem ekkert hefði í skorist.

Ég hallaði reyndar glugganum aftur og leyfði ekki frjálsar inn og útgöngur í dágóða stund.

Mikið fer þetta eðli kattarins í taugarnar á mér.

Ef......???

Wed, 10 Sep 2008 23:32:58 GMT

Ef ég hefði labbað út í dag og gæsahópur hefði flogið yfir.

Og ef ein gæsin hefði skitið og skíturinn hefði lent beint á mér.

Þá hefði ég brjálast.

Þetta gerðist sem betur fer ekki.

Helgi að koma

Fri, 05 Sep 2008 13:07:46 GMT

Ég er í fríi í dag.

Mikið er það dásamlegt.

Vikan er loksins á enda runnin og búið að redda því sem þurfti að redda í skólanum.

Nú byrjum við myndlistakennaranemar með hreint borð á mánudaginn.

Þessi önn samanstendur allt í einu af ógeðslegum fögum og ég hef, því miður, aldrei verið eins lítið spennt fyrir þessu námi mínu og nú.

Ég þarf víst að taka rosa mikið í tölvum núna… fótósjopp og svoleiðis sem ég er ótrúlega nálægt því að hata……

Ég verð í 36 einingum sem er slatti en ég held ég massi þetta.

Sem betur fer er haustönnin stutt og þessi verður vonandi ennþá fljótari að líða en venjulega þar sem ég fer í 5 vikur í vettvangsnám. Þá fæ ég að prófa að kenna ungviðinu myndlist og sköpun.

Þetta hlýtur að sleppa.

Ég er samt í alvöru talað svo hundfúl út af þeirri breytingu sem varð á töflunni minni að ég gæti grenjað.

Ef ég verð óvenju leiðinleg á næstu mánuðum þá er það tölvu-vankunnáttu minni að kenna en alls ekki mér sjálfri.

Ég tók samt ákvörðun í morgun:

Ég ætla að vera fúl og neikvæð yfir þessu í svona einn til tvo daga, skipta svo um gír…..og þá verð ég jákvæð og þetta verður gaman.

En ég er ekki alveg tilbúin í að sleppa geðvonskunni strax…..verð að pústa og vera pirruð og klára það….er löngu hætt að bæla slíkt niður….klára þetta bara fljótt og örugglega.

Ég vona að þið eigið góða helgi og njótið þess að anda inn og anda út….anda inn og anda út.

Skólatíð

Thu, 04 Sep 2008 09:04:14 GMT

Skólinn er byrjaður hjá mér.

Taflan er öll í rugli.

Það er búið að vera ótrúlegt vesen síðan útaf þessu síðan á mánudaginn.

Ég er ekki nógu ánægð með sameiningu háskólana þessa dagana.

Ég vildi að ég hefði fengið að klára Kennó á gamla mátann.

En ég vona að úr þessu rugli leysist í dag.

Eitt fag er að detta út og ég þarf að skrá mig í annað, en fæ ekki leyfi af því að þá er ég í allt of mörgum einingum, eitt fagið á að kenna en ekki meta til eininga og ég veit ekki hvað og hvað......allar stelpurnar sem eru með mér á kjörsviði er gjörsamlega brjálaðar.....líka ég!!

Það á ekki nógu vel við mig að standa í svona stressi.